تجربتي مع فيروس كورونا بقلم دكتورة (صافيناز قنديل )

في يوم ٣١/٥/٢٠٢٠ لاحظت اعراض البرد سخونية واحتقان في الحلق وتكسير في الجسم وتوجهت للمستشفي وطلب اشعة مقطعية وعرفت بعدها اني مصابة بفيروس كورونا اول شي فكرت فيه ان اعلن عن اصابتي بالفيروس اللعين عشان كل واحد اتعامل معايا ياخد حرصه ومن هنا ابتدا المشوار والحرب في اتجاهات كتير الحرب مع النفس لازم يكون الحالة النفسية كويسة صحيح مش هكدب عليكم حزنت لكن ثقتي في الله كانت اكبر واكبر من اي مرض... حرب مع المرض نفسه وأوجاعه بس بصراحة كان فيه وجع اقوي من المرض وهو بعض الناس نظرتهم ليا حتي الكلمة مفيش ممكن يكونوا خايفين انا معاهم لكن مش بالطريقة دي ودي مشكلة في مجتمعنا نظرة المريض بفيروس نظرة قاتلة ودا سبب بعض الناس بيخبوا ويتعايشوا مع الناس ..ولذلك يكثر عدد الإصابات والوفاة كل دا واقفة صامدة ..والحمد لله.. عزلت نفسي واخدت اكسجين والأدوية طبعا فيه متابعة طبية مستمرة لان حالتي الصحية كانت غير مستقرة.... في مواقف صعبة ومواقف أكثر من رائعة من الأصدقاء حقيقي بشكرهم لان المواقف الصعبة بتبين معادن الناس تعايشت١٤ يوم بل اكتر ما بين كلمات طيبة ومواقف اكتر من رائعة مع ناس اعرفهم وناس والله لم اعرفهم وكل دعوة كنت بشوفها من الناس كانت بتعطيني امل ان هنعدي صحيح كنت بسأل نفسي سؤال ما سر محبة الناس لي بهذه الطريقة وخوفهم عليا .... الحمد لله تخطيت المحنة لان ثقتي في الله قوية لما يضع الانسان المؤمن في اختبار ويكون في محنة بيعطي في نفس الوقت منحة من عنده ...ويارب يكون في ميزان حسناتي حبيت تشاركوني تجربتي وهقولكم خلاصة التجربة وما الدروس المستفادة منها ١_يجب الاهتمام بأي حد يصيب بفيروس كورونا من الأهل والجيران والاصدقاء لان مالوش اي ذنب والاهتمام به حتي ولو بكلمة ٢_يجب الاهتمام والحفاظ علي صحتنا وصحة أسرتنا وكلنا نشارك الدولة وندعمها حقيقي الموضوع مكلف جدا علي الدولة وعلي أسرة المريض ٣_احنا شعب عظيم وراقي فيجب اخذ المصل الحقيقي وهو (المودة والرحمة ) وإحياء الضمير في هذه الظروف الصعبة ..في ناس ماتت بسبب قلة الأدوية في الصيدليات والغلاء لبعض الأدوية وغلاء المستشفيات الخاصة كانوا بيطلوا ١٨ الف وعشرين ألف جنية في اليوم ٤_صدقوني اللي يخاف النهاردة من عطسته بكرة تحتاج بلازمته ولازم نتقي الله في بعض ٥_نحتاج بنظافة القلوب والإنسانية من الداخل قبل الكحول والمطهرات ٦_انا بصدر هاشتاج للتبرع بالبلازما #الدم_المصري_للمصري ٧_بشكر الجيش الأبيض علي مجهوداته العظيمة والفدائية وبشكر جيشنا العظيم اللي دايما سند لنا ... احب اختم كلامي بكل الشكر والتقدير لكل الاصدقاء والصديقات علي تعاونهم وحبهم ودعمهم ليا ويارب يحمي مصرو جيشها وشرطتها وشعبها العظيم الخير في امتي الي يوم القيامة لاخر نفس في عمري هقول تحيا مصر ...تحيا مصر...تحيا مصر ( الدكتورة صافيناز قنديل )